New Era#Tantangan menulis 365 hari ke 140#

Mak Ponggo Ka minum kopi. Nyo minta kopi ka rang rumahnya. Lah satangah jam manunggu, kopi ko ndak juo tibo do. Paneh hati Mak Ponggo, basorak mak ponggo dari barando rumah.

“ Mano Kopi ambo, Roy “. Sorak Mak Ponggo.

“ Kopi – kopi apo kecek uwo ko, gulo tu bana nan indak ado “. Jawek Siroy

“ Mangecek lah dari tadi. Ko lah kariang gigi den dek manunggu kopi “. Kato Mak Ponngo

“ Ka minum kopi juo uwo ?, lai namua jo garam “. Jawek Siroy mancibie.

Tabik suga Ponggo. Ndak di jawabnyo kecek bininyo tu do lai. Pai turun di racaknyo sepeda unto pai ka kadai kopi Piak Banun. Ndak barapo lamo, tibo mak Ponggo di kadai Piak Banun. Di dalam kadai, yuang kuriak lah minum teh sipadeh merah angek.

“ Apo Minum tu Yuang “. Sapo Mak Ponggo kurang sumangek

“ Ko minum anti corona , Mak. Kok kurang sumangek bana mamak nampaknyo “. Jawek Yuang Kuriak.

“ Itulah Yuang, alah satangah jam manunggu kopi buatan mintua ang tu, ndak juo kunjung tibo do. Di ingekan ka inyo, jo garam pulo kopi mamak ko nyo buekan “. Mak Ponggo curhat.

“ Itu ndak salah mintuo tu do Mamak. Gulo tu bana nan indak ado, jo apo kopi mamak ka dibuekan “. Jawek Yuang Kuriak.

“ Iyo Yuang. Gulo ndak ado, bareh lah abih. Ndak bisa bausaho kini do. PSBB di pa panjang pulo. Sabanta lai tibo pulo new normal “. Kaluah Mak Ponggo.

Paik Banun nan dari tadi hanyo mandanga, kini sato pulo nyo batanyo “ Apo pulo new normal tu mak ? “.

“ Tonton sajo lah tivi sorang piak, paniang mamak manjalehkan “. Jawek Mak Ponggo.

“ Baa kok paniang pulo mamak manjalehkan. New normal tu samo jo new era tu ma “. Kecek Yuang Kuriak asa sajo.

“ Apo Pulo kecek ang tu kuriak, new era tu namo tarompa mintuo ang tu ma “. Kecek Mak Ponggo sambie galak.

“ Asa sajo mamak ma “. Jawek Yuang Kuriak sambie maabihkan teh sipadehnyo.

Habistu nyo pai kalua kadai. Tingga Mak Ponggo jo penderitaannyo

Painan, 07 Juni 2020

#Tantangan menulis 365 Gurusiana (hari ke-140)